ஐக்கிய இலங்கைக்குள் நியாயமான தீர்வு விரைவாக வழங்கப்பட வேண்டும்! - நாடாளுமன்றில் சம்பந்தன் கோரிக்கை.
தமிழ் மக்கள் பல தசாப்தங்களாக எதிர்கொண்டு வரும் பிரச்சினைக்கு ஐக்கிய இலங்கை எனும் கட்டமைப்புக்குள் நிரந்தரமானதும் நீடித்து நிலைக்கக் கூடியதும் நியாயபூர்வமானதும் அதே நேரம் பலனளிக்கக் கூடியதுமான தீர்வொன்றையே நாம் எதிர்பார்க்கின்றோம். இந்த இலக்கினை அடைந்து கொள்வதற்கு தமிழ்த் தேசியக் கூட்டமைப்பு முழுமையான ஆதரவினை வழங்கும் என்று கூட்டமைப்பின் தலைவர் இரா. சம்பந்தன் நேற்று பாராளுமன்றத்தில் தெரிவித்தார்.
அவர் இங்கு தொடர்ந்தும் உரையாற்றுகையில், இலங்கையின் புதிய ஜனாதிபதியாக பதவியேற்றிருக்கும் மைத்திரிபால சிறிசேன புதிய பிரதமர் ரணில் விக்கிரமசிங்க ஆகியோருக்கும் அவரது புதிய அரசாங்கத்துக்கும் தமிழ்த் தேசியக் கூட்டமைப்பின் வாழ்த்துக்களைத் தெரிவித்துக் கொள்கிறேன்.அதேபோல் மைத்திரிபால சிறிசேனவை ஜனாதிபதியாக்குவதற்கு வாக்களித்த நாட்டின் அனைத்து தமிழ்ப் பேசும் மக்களுக்கும் நன்றியையும் தெரிவித்துக் கொள்கிறேன்.
ஜனாதிபதித் தேர்தலின் போது தமிழ்த் தேசியக் கூட்டமைப்பு எந்தவிதமான நிபந்தனைகளும் இன்றிய நிலையிலேயே மைத்திரிபால சிறிசேனவுக்கு ஆதரவினை வழங்கியிருந்தது. அத்துடன் நாம் ஆதரவு வழங்குகிறோம் என்பதற்காக எந்தவொரு பதவியையும் கோரவில்லை.இனவாதம் மற்றும் இனவாத உணர்வுகளைத் தூண்டுவதன் மூலமான தேர்தல் இலாபம் அடைதல் உள்ளிட்ட விடயங்களையும் அவற்றினூடான முயற்சிகளையும் நாம் அறிந்தே வைத்திருந்தோம்.
எப்படியிருப்பினும் இவ்வாறான முறைகேட்டுப் பிரசாரங்களில் இறங்குமளவுக்கு நாம் யாருக்கும் சந்தர்ப்பங்களை அமைத்துக் கொடுத்திருக்கவில்லை. எமது தேர்தல் நடவடிக்கைகள் முழு நாட்டுக்கும் எடுத்துக் காட்டாக இருந்தது.முன்னாள் ஜனாதிபதிக்கு ஆதரவாக தேர்தல் பிரசாரக் காலம் முழுவதும் அரச வளங்கள் மிகவும் அதிகமாகப் பயன்படுத்தப்பட்டன. இவ்வாறான அரச அதிகாரம் மற்றும் வளங்கள் துஷ்பிரயோகம் ஆகியவற்றுக்கு மத்தியிலும் மைத்திரிபால சிறிசேன பரவலான ஆதரவினைப் பெற்று வெற்றி பெற்றுள்ளார்.
வடக்கிலும் கிழக்கிலும் அதே போன்று முழு நாட்டலும் தமிழ் மக்களும் தமிழ் பேசும் மக்களும் தமிழ்த் தேசியக் கூட்டமைப்பின் தீர்மானத்துக்கு ஒருமித்த பதிலைப் பெற்றுக் கொடுத்திருந்தனர். மைத்திரிபால சிறிசேனவுக்கு மனப்பூர்வமான ஆதரவினைப் பெற்றுக் கொடுத்த அந்த மக்களுக்கு எமது நன்றிகளைத் தெரிவித்துக் கொள்கிறோம்.தமிழ் மக்களும் தமிழ் பேசும் மக்களும் நாட்டின் அனைத்து மக்களுடன் இணைந்து ஜனாதிபதி மைத்திரிபால சிறிசேனவின் நூறு நாள் வேலைத் திட்டத்தினை உள்வாங்கி ஆட்சி மாற்றத்துக்கும் வழி வகை செய்துள்ளனர்.
இந்நிலையில் பல தசாப்தங்களாக தமிழ் மக்கள் எதிர்கொண்டு வருகின்ற பிரச்சினைகளுக்கு தீர்வு ஒன்று காணப்படுதல் வேண்டும். ஐக்கியமானதும் அதே நேரம் பிளவுபடாததுமான இலங்கை எனும் கூட்டமைப்புக்குள் நிரந்தரமானதும் நீடித்து நிலைக்கக்கூடியதும் அத்துடன் பலனளிக்கக் கூடியதான தீர்வையே எதிர்பார்க்கின்றோம். இதற்காக தமிழ்த் தேசியக் கூட்டமைப்பு முழு ஆதரவினை வழங்கி ஒத்துழைக்கும்.
60 வருடங்களுக்கு மேலாக நிலைத்து வரும் இப்பிரச்சிகைக்கு தீர்வு காணப்படாத காரணத்தால் ஏற்பட்டுள்ள பாதகமான நிலைகளால் இந்நாட்டுக்கு பெரும் பாதிக்குக்களே ஏற்பட்டிருக்கின்றன. ஆகவே முழுநாட்டினதும் நலன் கருதி தமிழ் மக்களின் பிரச்சினைகளுக்கு தீர்வு காணப்படவேண்டும் என்று வலியுறுத்துகிறேன்.
அத்துடன் இது அவசரமான விடயமாகவும் கருதப்பட வேண்டும். இந்த இலக்கை அடைவதற்கு நாம் பூரணமாக ஒத்துழைப்போம். ஏனைய மக்களும் இதற்கு ஒத்துழைப்பர் என்றார்.
0 கருத்துகள்:
கருத்துரையிடுக